Bakı. 30 may. REPORT.AZ/ Türkiyədə terror aktı törədilib. “Report” “Anadolu” xəbər agentliyinə istinadən məlumat verir ki, Şırnak vilayətinin Silopi bölgəsində baş vermiş partlayış zamanı 4 nəfər ölüb, 19 nəfər xəsarət alıb.
Məlumata görə, partlayış axşam saatlarında polisə məxsus zirehli avtomobilin ərazidən keçdiyi zaman baş verib. Yaralılar Silopi Dövlət Xəstəxanasına aparılıb.
Xəsarət alanlardan beşi polis əməkdaşıdır. Yaralılardan bir neçəsinin vəziyyətinin ağır olduğu bildirilir.
Partlayışın baş verdiyi bölgəyə çoxlu sayda polis əməkdaşı cəlb edilib və terrorçuların yaxalanması üçün xüsusi əməliyyata başlanılıb.