Bakı. 8 iyul. REPORT.AZ/ Şimali Koreyada ilk dəfə olaraq turistlər ölkəni qatarla gəzə biləcək. "Report" "İnterfax"a istinadən xəbər verir ki, məlumatı ölkənin "Koryo Tours" turist firması yayıb.
Xəbərə görə, qatar bu il oktyabrın 2-də yola düşəcək və həmin ayın 10-da paytaxt Pxenyana qayıdacaq. Səyahətin marşrutu bir neçə yüz kilometrlik olacaq. Turistlər ölkənin şimal-şərqində yerləşən Mehyansan dağına, Hamhung və Çongjin şəhərlərinə səfər edə biləcəklər.
Firma bildirib ki, bir nəfər üçün səyahət 2,8 min avroya başa gəlir və turistlər səyahətə 1970-ci illərdə istehsal olunan vaqonlarda çıxacaqlar.