Fransada polislər nümayişçilərə qarşı gözyaşardıcı qaz və su şırnağından istifadə edib

Bakı. 24 noyabr. REPORT.AZ/ Fransanın paytaxtı Paris şəhərində benzin və digər yanacaq növlərinin qiymətinin bahalaşmasına etirazlar səngimir.

“Report” xarici KİV-ə istinadən xəbər verir ki, on minlərlə insan şəhərində mərkəzində əyinlərində işığı əks edən sarı örtükdə toplaşaraq “Sarı jiletlər” hərəkatına həmrəylik nümayiş etdirirlər.

“Makron - istefa!” şüarı səsləndirərək Zəfər Tağına doğru hərəkət edən nümayişçilər polisin müqavimətindən sonra Razılaşma meydanına daxil olmağa cəhd göstəriblər. Buradan isə Elise meydanına sıxışdırılan nümayişçilərə qarşı polis gözyaşardıcı qaz və su şırnağından istifadə edib.

Qeyd edək ki, bu gün Parisdə kütləvi nümayişlər səbəbindən ictimai nəqliyyat iflic olub, şəhərin mərkəzindəki bir sıra metro stansiyaları bağlanıb.