Almaniya başqa Aİ ölkələrinə rekord sayda qaçqın göndərib

Bakı. 21 yanvar. REPORT.AZ/ Almaniya hökuməti 2018-ci ilin yanvar – noyabr aylarında sığınacaq üçün ərizə verən 8,6 min nəfərdən çoxunu Avropa İttifaqı (Aİ) üzvü olan digər ölkələrə göndərib.

“Report” TASS-a istinadən xəbər verir ki, Federal Miqrasiya və Qaçqınlar Ofisinin (BAMF) məlumatına görə, bu, Aİ çərçivəsində deportasiyalar baxımdan Almaniya üçün rekord rəqəmdir. Belə ki, 2017-ci il ərzində 7102 nəfərə qarşı 2018-ci ilin 11 ayında 8658 nəfər ölkədən deportasiya olunub.

Ötən il Almaniyada sığınacaq ərizələrinin üçdə biri ərizəçi ilə bağlı məsuliyyəti hansısa başqa Aİ üzv ölkəsinin üzərinə qoyan Dublin sazişinin şərtlərinə uyğun gəlib. Odur ki, sözügedən müddət ərzində BAMF ölkə ərazisindəki qaçqınları qəbul etməklə bağlı başqa Aİ ölkələrinə 51,5 min ərizə göndərib, bunlardan 35 mini qəbul edilib.

Digər tərəfdən, Aİ üzvü olan digər ölkələrdən Almaniyaya 7205 miqrant göndərilib ki, bunların yarısından çoxu Yunanıstanın payına düşür.