Yuxarı
    Bağlamaq

    Mübariz Qurbanlı ​İtaliyanın Coğrafiya Cəmiyyətinin nümayəndələri ilə görüşüb

    Qonaqlara Azərbaycanda mövcud olan tarixi, mədəni abidələr haqqında kitablar təqdim edilib

    Bakı. 1 may. REPORT.AZ/  Dini Qurumlarla İş üzrə Dövlət Komitəsinin sədri Mübariz Qurbanlı Azərbaycanda səfərdə olan İtaliyanın Coğrafiya Cəmiyyətinin nümayəndələri ilə görüşüb. 

    Dövlət Komitəsinin mətbuat xidmətindən "Report"a verilən məlumata görə, görüşdə İtaliya ilə Azərbaycan arasında ikitərəfli əlaqələrin inkişafından bəhs edilib.

    M.Qurbanlı qonaqlara Azərbaycanda mövcud olan tolerantlıq ənənələri, multikultural mühit haqqında məlumat verib.

    Qeyd edib ki, dünyanın tolerantlıq və multikulturalizm mərkəzlərindən birinə çevrilməkdə olan Azərbaycanda müxtəlif dinlərin nümayəndələri sülh şəraitində yaşayırlar. O, həmçinin Azərbaycandakı dini tolerantlığın təşviqi məqsədilə dövlət tərəfindən görülən işlər barədə məlumat verib.

    Dünyəviliyin və tolerantlığın Azərbaycan xalqının təfəkkür tərzi olduğunu söyləyən komitə sədri Azərbaycanda bütün konfessiyaların dinc şəraitdə fəaliyyət göstərdiyini söyləyib. O əlavə edib ki, bunu heç bir cərəyan, heç bir qüvvə dəyişə bilməz. M.Qurbanlı vurğulayıb ki, Azərbaycandakı multikultural və tolerant cəmiyyətimiz Avropada da təşviq edilə bilər. İtaliyalı qonaqlara dini durum, dini icmalar, eləcə də məscid və ziyarətgahlar, tarixi abidələrlə bağlı ətraflı məlumat verilib.

    Nümayəndə heyətinin rəhbəri, İtaliya Coğrafiya Cəmiyyətinin fəxri prezidenti, professor Franko Salvatori Azərbaycana səfərdən məmnun olduqlarını bildirib. Rəhbərlik etdiyi təşkilat haqqında məlumat verən F. Salvatori deyib ki, 1867-ci ildə yaranan Cəmiyyət ayrı-ayrı ölkələrə ekspedisiyalar təşkil edir. Qonaq Azərbaycanda tolerantlıq, multikulturalizm sahəsində görülən işlərin beynəlxalq miqyasda yüksək qiymətləndirildiyini vurğulayıb.

    Görüşdə, həmçinin, qarşılıqlı əməkdaşlığın perspektivləri və gələcəkdə birgə layihələrin həyata keçirilməsi məsələləri müzakirə edilib.

    Qonaqlara Azərbaycanda mövcud olan tarixi, mədəni abidələr haqqında kitablar təqdim edilib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi