Yuxarı
    Bağlamaq

    Azərbaycan və Pakistan “Dini tolerantlığın gücləndirilməsi və radikalizmlə mübarizə” mövzusunda beynəlxalq konfrans keçirib

    DQİDK sədrinin müavini Azərbaycanda fəaliyyət göstərən məscidlərin sayının 2000-dən çox olduğunu qeyd edib

    Bakı. 9 dekabr. REPORT.AZ/ Bu gün Dini Qurumlarla İş üzrə Dövlət Komitəsinin və Pakistan Strateji Tədqiqatlar İnstitunun (PSTİ) təşkilatçılığı və Azərbaycanın Pakistandakı səfirliyinin dəstəyi ilə İslamabad şəhərində “Dini tolerantlığın gücləndirilməsi və radikalizmlə mübarizə” mövzusunda beynəlxalq konfrans keçirilib. Bu barədə "Report"a komitənin mətbuat xidmətindən bildirilib.

    PSTİ-nin sədri, səfir Xalid Mahmud iki qardaş ölkənin tolerantlığın gücləndirilməsi istiqamətində təcrübəsinin öyrənilməsi baxımından bu konfransın xüsusi əhəmiyyət daşıdığını vurğulayıb.

    Konfransda çıxış edən DQİDK sədrinin müavini Gündüz İsmayılov Azərbaycan hökumətinin ölkədə dini tolerantlığın qorunması və radikalizmlə mübarizə istiqamətində həyata keçirdiyi siyasətdən danışıb. O qeyd edib ki, ölkənin uğurlu sosial-iqtisadi inkişafının təmin edilməsi cəmiyyətin problemlərinin həlli istiqamətində atılmış mühüm addımlar, dini maarifləndirmə işinin gücləndirilməsi və gənclərlə iş, həmçinin müxtəlif inzibati tədbirlər Azərbaycan dövlətinin anti-radikalızm siyasətinin əsas elementlərini təşkil edir.

    Panellərdə işini davam etdirən konfransda PSTİ-nin baş direktoru Rasul Baxş Rəis, Bakı Dövlət Universitetinin İlahiyyat fakültəsinin müəllimi Aqil Şirinov, PSTİ-nin ekspertləri Muhammad İslam və İcaz Şəfi Ğilani, həmçinin DQİDK-nin şöbə müdirləri Niyaz Yaqublu və Nicat Məmmədli çıxış ediblər. Çıxışlar zamanı radikalizmi doğuran səbəblər, onunla mübarizədə hər iki ölkənin qarşılaşdığı məsələlər müzakirə edilib, bu istiqamətdə təcrübə mübadiləsinin və gələcək əməkdaşlığın zəruriliyi vurğulanıb.

    Konfransdan sonra iştirakçılar Azərbaycan məscidlərinin fotolarından ibarət “Azərbaycan-İslam mədəniyyətinin incisi” sərgiyə baxış keçirib. DQİDK sədrinin müavini G.İsmayılov qonaqlara bu gün Azərbaycanda fəaliyyət göstərən məscidlərin sayının 2000-dən çox olduğunu qeyd edərək onlara dövlət qayğısından danışıb. Sərgidə 40-dan çox məscid, o cümlədən Azərbaycanın Qarabağdakı erməni işğalı altında olan məscidlərimizin işğaldan əvvəlki və sonrakı fotoları nümayiş etdirilib.

    Konfrans və sərgidə Azərbaycanın Pakistandakı səfiri Daşqın Şikarov və səfirliyin əməkdaşları, həmçinin xarici ölkələrin bu ölkədəki diplomatik nümayəndəliklərinin rəhbərləri və əməkdaşları, ekspertlər, media və ictimaiyyət nümayəndələri iştirak ediblər.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi