Yəmən ordusu atəşkəsə riayət etməkdə davam edəcək

Bakı. 18 may. REPORT.AZ/ Səudiyyə Ərəbistanın rəhbərlik etdiyi koalisiyanın husilərin mövqelərinə aviazərbələri bərpa etməsinə baxmayaraq, Yəmən silahlı qüvvələri atəşkəs rejiminə riayət etməkdə davam edəcək.

"Report" TASS-a istinadən xəbər verir ki, bu barədə Yəmən Respublikası silahlı qüvvələrinin nümayəndəsi polkovnik Şərəf Qaleb Lakman dünən Sanada keçirilən mətbuat konfransında çıxışı zamanı bildirib. Bununla da o, mayın 12-də elan olunan atəşkəs rejiminin BMT tərəfindən uzadılması haqqında təklifini rəsmi şəkildə dəstəkləyib. 

"Biz BMT baş katibinin Yəmən üzrə xüsusi nümayəndəsi İsmayıl Uld Şeyx Əhmədin ölkəyə humanitar yardımın fasiləsiz çatdırılması məqsədilə atəşkəs rejiminin uzadılmasına dair çağırışlarını alqışlayırıq", - polkovnik deyib.

Lakman vurğulayıb ki, Yəmən ordusu atəşkəsə riayət etməkdə davam edəcək. Bununla yanaşı, o, atəşkəsin pozulmasına görə bütün məsuliyyəti Səudiyyə Ərəbistanı silahlı qüvvələrinin üzərinə qoyub.