Bakı. 12 yanvar. REPORT.AZ/ Türkiyə Xarici İşlər Nazirliyi vətəndaşlarına ABŞ-a səfərin təhlükəsizlik baxımından arzulanmaz olması ilə bağlı xəbərdarlıq edib.
"Report" Türkiyə KİV-inə istinadən xəbər verir ki, bu, ABŞ Dövlət Departamenti tərəfindən atılan analoji addıma cavab olub.
"ABŞ-da terror və zorakılıq aktlarının, eləcə də vətəndaşlarımızın əsassız həbsi halları və hökumət orqanlarının onlara münasibətdə qanunsuz hərəkətlərinin artımı müşahidə olunur. Bununla əlaqədar vətəndaşlarımıza ABŞ-a səfər planlarını yenidən nəzərdən keçirməyi tövsiyə edirik. Təcili səfərlər zamanı diqqətli olmağa çağırırıq", - Türkiyə XİN-in bəyantında deyilir.
Qeyd edək ki, ABŞ Dövlət Departamenti daha əvvəl amerikalılara yüksək terror təhlükəsi ilə əlaqədar Türkiyəyə səfərlərdən yayınmağı tövsiyə edib, Türkiyəni Pakistan və Sudan ilə birgə təhlükənin yüksək olduğu ölkələr sırasına daxil edib.
Bundan sonra ABŞ-ın Türkiyədəki müvəqqəti işlər vəkili Filip Kosnett gün ərzində iki dəfə Türkiyə XİN-ə çağırılıb və ona Ankaranın ABŞ hökumətinin xəbərdarlığından hiddətləndiyi bildirilib.