Türkiyə, İran, Rusiyanın Xarici İşlər nazirləri Suriyanı müzakirə ediblər

ABŞ-da BMT Baş Assambleyasının 74-cü sessiyası çərçivəsində Suriya münaqişəsinin həllinə dair Astana prosesinin zəmanətçi ölkələri olan Türkiyə, İran, Rusiyanın Xarici İşlər nazirləri Mövlud Çavuşoğlu, Məhəmməd Cavad Zərif və Sergey Lavrov arasında görüş keçirilib.

“Report” TASS-a istinadən xəbər verir ki, bu barədə Rusiya Xarici İşlər Nazirliyinin yaydığı açıqlamada deyilir.

Nazirlər Suriyada mövcud olan döyüş bölgələrini, o cümlədən İdlib əyalətindəki vəziyyəti müzakirə ediblər.

Tərəflər Suriyakı humanitar böhran barədə fikir mübadiləsi aparıb, ölkəyə beynəlxalq yardımın artırılmasının vacibliyini qeyd ediblər. Nazirlər suriyalıların “siyasiləşmədən və ön şərt olmadan” daimi yaşayış yerlərinə qayıtması prosesinə dəstək verilməsini də diqqətə çatıdırıblar.

Diplomatlar Suriyada Konstitusiya Komitəsinin tezliklə yaradılaraq fəaliyyətə başlaması məramına sadiq olduqlarını təsdiqləyiblər.