Buxarest, 24 iyun. REPORT.AZ/ Son iki gündə Rumıniyada havaların kəskin istiləşməsi 10-dan çox insanın həyatına son qoyub.
“Report”un Şərqi Avropa bürosunun məlumatına görə, anomal istilər ölkənin şimal-şərqində yerləşən Vasluy, Arceş və İaşi rayonlarında müşahidə olunub.
Burada havanın temperaturu 40 dərəcəyə qədər qalxıb. Vasluy rayon Təcili Tibbi Yardım Stansiyasından verilən məlumata görə, ötən gün anomal istilər nəticəsində 8 nəfər ölüb, 1 nəfər isə koma vəziyyətinə düşüb. İaşi rayonunda 2, Arceş rayonunda isə 1 nəfər günvurmanın qurbanı olub.
Həyatlarını itirənlərin əksəriyyəti havanın isti keçməsinə baxmayaraq əkin sahələrində çalışanlardır. Meteoroloqların verdiyi məlumata görə, həftə sonu Rumıniyanın cənub-qərbində yerləşən daha 11 rayonda havaların kəskin istiləşəcəyi, temperaturun 41 dərəcəyə qədər yüksələcəyi gözlənilir.
Artıq həkimlər ölkə sakinlərinə xüsusilə günorta saatlarında mümkün qədər evdən çölə çıxmamağı tövsiyə edirlər.