Pentaqon NATO-nun şərq cinahının təhlükəsizliyini güclənirir

ABŞ-ın müdafiə naziri Lloyd Ostin Bolqarıstana səfəri zamanı bu ölkənin rəhbərliyi ilə NATO-nun şərq cinahının gücləndirilməsi ilə bağlı məsələləri müzakirə edib.

“Report” xəbər verir ki, bu barədə Pentaqonun sözçüsü Con Kirbinin yaydığı məlumatda deyilir.

Ostin Bolqarıstanın baş naziri Kiril Petkov və müdafiə naziri Draqomir Zakovla görüşüb. Pentaqonun rəhbəri ikitərəfli strateji tərəfdaşlığın vacibliyini qeyd edib və Birləşmiş Ştatların bu həlledici anda NATO-nun şərq cinahının təhlükəsizliyini təmin etməyə sadiq olduğunu vurğulayıb.

Bəyanata görə, Ostin Ukraynaya humanitar yardıma verdiyi töhfəyə və yeni çoxmillətli döyüş qrupunun yerləşdirilməsinə görə Bolqarıstanın minnətdarlığını ifadə edib.

Ostin birgə təlimlərdə iştirak edən Bolqarıstan və Amerika hərbçiləri ilə də görüşüb.