Fransız polisi Parisə girişlərdə aparılan axtarış zamanı üzərindən qadağan edilmiş əşyalar tapılan insanları saxlayır.
"Report" TASS-a istinadən xəbər verir ki, bu barədə çərşənbə günü Parisin Polis İdarəsinin rəsmi nümayəndəsi Letisiya Vallar bildirib.
"Saat 11:00-ə qədər artıq 35 nəfər saxlanılıb. Dünən axşamdan etibarən aparılan nəzarət prosedurları zamanı saxlanılan şəxslərdə benzin dolu qablar, dəyənəklər, çəkiçlər tapılıb", - o deyib.
Polis rəsmisi hökumət orqanlarının 1 May nümayişlərində 2 minə qədər radikal düşüncəli "sarı jiletli" olacağını gözlədiyini vurğulayıb.
L.Vallar bildirib ki, asayişin qorunmasında qalxanlı polis məmurları ilə yanaşı, adi vətəndaş qiyafəsində nümayişçilər arasında olacaq hüquq-mühafizə orqanlarının əməkdaşları da iştirak edəcək: "Əsas məqsədimiz hər şey yaxşı getdiyindən, heç bir şey olmayacağından və heç kimin xəsarət almayacağından əmin olmaqdır".
Daha əvvəl Fransanın Daxili İşlər naziri Kristof Kastaner Parisdə 1 May nümayişlərində 7400 polis və jandarmın asayişi qoruyacağını söyləyib.