Yuxarı

Obama: İqlim dəyişikliyi məsələsinin həlli iqtisadi və təhlükəsizlik baxımından zərurətdir

ABŞ prezidenti iqlim dəyişikliyini olduqca böyük və nəsillərə təsir göstərən bir problem adlandırıb

Bakı. 1 dekabr. REPORT.AZ/ ABŞ prezidenti Barak Obama hesab edir ki, iqlim dəyişikliyi məsələsinin həlli istiqamətində fəaliyyətə keçmək iqtisadi və təhlükəsizlik baxımından zəruridir. "Dünyanın bu sürətlə istiləşməsinə, dəniz suyunun səviyyəsinin bu sürətlə qalxmasına və hava şəraitinin ən gözlənilməz şəkildə dəyişməsinə imkan versək, biz iqtisadi və hərbi resurslarımızı insanlar üçün imkanların artması deyil, daha çox planetdəki dəyişikliyin nəticələrinin aradan qaldırılmasına sərf etməli olacağıq"-deyə Amerika lideri bildirib.

"Report" "Amerikanın Səsi"nə istinadən xəbər verir ki, Obama bu açıqlamaları Parisdə BMT-nin İqlim sammiti çərçivəsində müxbirlərlə keçirdiyi mətbuat konfransı zamanı verib. Dünya liderləri Paris konfransında hava temperaturunun sənaye inqilabı dövrü ilə müqayisədə iki dərəcə Selsidən çox yuxarı qalxmaması üçün görüləcək tədbirlər üzərində işləyir.

ABŞ prezidenti iqlim dəyişikliyini olduqca böyük və nəsillərə təsir göstərən bir problem adlandırıb. O bildirib ki, iqlim dəyişikliyi "hər hansı bir siyasi sistem üçün çətin bir problemdir", çünki o tədricən baş verir və onun ölçülməsi çox vaxt mümkün olmur.

"Mən əminəm ki, biz burada böyük işlər görə biləcəyik. Onu yadınızda saxlayın ki, heç kəs Parisə iqlimlə bağlı ciddi hədəflərlə 180 ölkənin gələcəyini gözləmirdi"-deyə Obama iki günlük səfərini başa çatdıraraq, Vaşinqtona yola düşməzdən əvvəl bildirib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi