Liviyanın xarici işlər naziri: "Ölkə xaos və xarici müdaxilədən əziyyət çəkir"

Liviya parçalanma və qütbləşmə vəziyyətində yaşayır, xaos və xarici müdaxilələrdən əziyyət çəkir.

"Report" xəbər verir ki, bunu ölkənin xarici işlər naziri Nəclə Manquş Londonda yerləşən Beynəlxalq Strateji Araşdırmalar İnstitutunun təşkil etdiyi “Manama Dialoqu” konfransında çıxışında deyib.

“Ölkəmizin işlərinə çoxtərəfli müdaxilədən əziyyət çəkirik ki, bu da qeyri-sabitliyə səbəb olur. Mövcud şərait həm onun daxilində, həm də regionda təhlükəsizliyə xələl gətirir. Bütün Liviyalıları təmsil etməyən liderləri seçsək, bu, parçalanmanı daha da dərinləşdirəcək”, - Manquş bildirib.

Qeyd edək ki, Liviyada bir neçə ildir ki, paralel olaraq iki icraedici orqan mövcud olub: Tripolidə Faiz Sərrac Milli Razılıq Hökuməti və şərqdə parlament və Xəlifə Haftarın Liviya Milli Ordusu tərəfindən dəstəklədiyi müvəqqəti kabinet. 2019-cu ilin aprelində tərəflər arasında qarşıdurma Türkiyənin müdaxiləsindən sonra aradan qalxıb.

Fevral ayında İsveçrədə keçirilən Liviya Siyasi Dialoq Forumu Milli Birlik Hökumətinin yeni baş naziri Abdel Həmid Dbeibanı və Prezident Şurasının üç üzvünü seçib. Hər iki şəxs Tripolidə müxtəlif güc strukturlarını birləşdirmək, həmçinin dekabrın 24-də prezident və parlament seçkilərini keçirmək məqsədi ilə vəzifələrinin icrasına başlayıb.