Kuba parlamenti oktyabrın 10-da ölkə prezidentini seçəcək

Kubanın Xalq Hakimiyyəti Milli Məclisi (birpalatalı parlament) bu ilin fevralında keçirilmiş referendumda qəbul edilmiş yeni konstitusiyaya uyğun olaraq oktyabrın 10-da keçirəcəyi növbədənkənar yığıncaqda ölkə prezidentini seçəcək.

"Report" TASS-a istinadən xəbər verir ki, bu barədə parlamentin xəbərində bildirilir.

İclasda həmçinin ölkənin vitse-prezidenti, Dövlət Şurasının üzvləri və parlamentin sədri seçiləcək.

Qeyd edək ki, fevralın 24-də keçirilmiş referendumda 6,81 milyondan çox kubalı - ölkə əhalisinin səsvermə hüququ olan 73,3 faizi yeni konstitusiyaya səs veriblər.

Daha əvvəl ABŞ "insan hüquqlarının pozulmasında iştirak etdiyi üçün" Kuba Kommunist Partiyası Mərkəzi Komitəsinin birinci katibi Raul Kastronun və onun ailəsinin adlarını sanksiya siyahısına salıb.