Bakı. 8 mart. REPORT.AZ/ Əfqanıstanın paytaxtı Kabil şəhərində hərbi hospitala hücum nəticəsində 30-dan artıq insan ölüb, 50 çox adam yaralanıb.
"Report" "RİA Novosti"yə istinadən xərir ki, Əfqanıstan Daxili İşlər Nazirliyi əməliyyatın başa çatdığını və 5 terrorçunun hamısının zərərsizləşdirildiyini açıqlayıb.
Silahlılardan biri xəstəxananın əsas girişində özünü partladıb, digər 4-ü isə təhlükəsizlik qüvvələri tərəfindən xəstəxananın daxilində öldürülüb.
*** 14:46
İŞİD terror qruplaşması Əfqanıstanın paytaxtı Kabil şəhərində hərbi hospitala hücuma görə məsuliyyəti öz üzərinə götürüb.
"Report" Əfqanıstan KİV-inə istinadən xəbər verir ki, silahlıların hucumu nəticəsində ölənlərin sayı 4, xəsarət alanların sayı isə 66 nəfərə çatıb.
*** 11:06
Əfqanıstanın paytaxtı Kabil şəhərində hərbi hospitala hücum nəticəsində 2 nəfər ölüb, 15 nəfər yaralanıb.
"Report" "Reuters"ə istinadən xərir ki, ölənlərdən biri xəstəxananın işçisi, digəri isə pasiyentdir.
Məlumata görə, hərbi hospitala hücum edən silahlı şəxslər 5 nəfərdir və onlardan biri həkim xalatında olub. Silahlılardan biri xəstəxananın əsas girişində özünü partladıb. Digərləri isə binaya daxil olublar.
Şahidlər üzərində həkim xalatı olan şəxsin "AK-47" tipli avtomatdan atəş açdığını və atəş səslərinin başqa yerlərdən də eşidildiyini söyləyiblər.
Xəbərdə bildirilib ki, hələlik regionda fəaliyyət göstərən heç bir qruplaşma hadisəyə görə məsuliyyəti öz üzərinə götürməyib.
*** 09:41
Əfqanıstanın paytaxtı Kabil şəhərində, ABŞ səfirliyinin yaxınlığında partlayış baş verib.
"Report" "Reuters"ə istinadən xərir ki, partlayış hərbi hospitalın yerləşdiyi binada baş verib, atəş səsləri eşidilir.
Hazırda tibb müəssisənin ABŞ-ın Kabildəki səfirliyi yaxınlığında yerləşdiyi dəqiqləşdirilir.
Partlayışın təfərrüatları barədə məlumat verilmir.