Bakı. 19 yanvar. REPORT.AZ/ "Dünyada 200-dən artıq ərazi və sərhəd münaqişəsi mövcuddur, ancaq Avropa İttifaqı İsrailə münasibəttə belə mövqe tutmaqla ikili standart siyasəti yürüdür".
"Report" İsrail KİV-inə istinadən xəbər verir ki, İsrail XİN-in Avropa İttifaqının (Aİ) ötən gün qəbul etdiyi qətnamə ilə bağlı yaydığı bəyanatda belə deyilir.
İsrail XİN Fələstin Milli Muxtariyyətinin "terror fəaliyyətindən" Aİ-yə şikayət edib. Şikayətdə bildirilib ki, belə bir yanaşma Avropanın yəhudi dövləti ilə Fələstin arasındakı münaqişənin həllində fəal iştirakına imkan vermir.
"Sionist düşərgəsi" İsrail müxalifət blokunun lideri İtshak Hersoq da Aİ-nin qərarına münasibət bildirib: "Təəssüf edirəm ki, Avropa İttifaqının liderləri İsraili qanunsuz elan edənlərə köməklik göstərir".
Qeyd edək ki, ötən gün Aİ-yə üzv dövlətlərin xarici işlər nazirlərinin toplantısında qəbul edilən qətnamədə qurum İsraili 1967-ci il sərhədləri çərçivəsində tanıdığını bildirib.