Bakı. 31 may. REPORT.AZ/ İraqın Əl-Fəlluca şəhərinin azad edilməsinə qatılan təhlükəsizlik qüvvələrinə hücum edən terrorçu İŞİD qruplaşmasının 75 silahlısı öldürülüb.
"Report" TASS-a istinadən xəbər verir ki, bunu antiterror əməliyyatının komandanı Abdül Vahhav əs-Səid bildirib.
Onun sözlərinə görə, İŞİD qruplaşması bu gün təhlükəsizlik qüvvələrinə hücum etməyə cəhd göstərib: "Qruplaşmanın yüzə yaxın silahlısı Əl-Fəllucanın Ən-Nuaymiya rayonunun cənubuna doğru hərəkət edib. Hərbi Hava Qüvvələrinin havadan dəstəyi nəticəsində 75 terrorçu zərərsizləşdirilib".
Qeyd edək ki, Əl-Fəllucanın terrorçu İŞİD qruplaşmasından təmizlənməsi istiqamətində mayın 30-da başlayan irimiqyaslı hərbi əməliyyatlar davam edir.