Bakı. 1 avqust. REPORT.AZ/ Hindistanın Qucarat ştatında daşqınlardan ölənlərin sayı 218 nəfərə çatıb.
"Report" xəbər verir ki, bu barədə "Sinxua" agentliyi Hindistanın Təbii Fəlakətlərlə Mübarizə üzrə İdarəsinin nümayəndəsinə istinadən məlumat yayıb.
İdarənin nümayəndəsi bildirib ki, təkcə Banaskantxanın bir dairəsində 61 nəfər təbii fəlakətin qurbanı olub. Onun sözlərinə görə, Qucarat ştatının şimal hissəsində, təbii fəlakətdən daha çox əziyyət çəkən Banaskantxa və Patan dairələrində son iki gün ərzində suyun səviyyəsinin enməsindən sonra daha çox ölünün meyiti aşkar edilib.
Qucarat ştatı güclü yağışlar səbəbindən tamamilə daşqınlara təslim olub. Statistikaya görə, ötən həftə ərzində Hindistanın xilasetmə bölmələri 11 min zərərçəkəni xilas edib. Daha 39 min nəfər təhlükəsiz yerə təxliyə edilib.