Estoniya parlamenti baş naziri istefaya göndərib

Bakı. 9 noyabr. REPORT.AZ/ Estoniya Parlamentinin plenar iclasında baş nazir Taavi Rıyvasa etimadsızlıq üzrə səsvermə keçirilib.

"Report"un məlumatına görə, bu barədə "ERR" nəşri xəbər yayıb.

Məlumata görə, səsvermə zamanı parlamentin 63 deputatı baş nazirə etimadsızlıq göstərib. Bu qərarın əleyhinə isə 28 nəfər çıxıb. Səsvermələr zamanı bitərəf olmayıb.

Qeyd edək ki, baş nazir Taavi Rıvays istefaya könüllü getməkdən imtina etdikdən sonra onun koalisiya tərəfdaşları – Sosial Demokrat Partiyası (SDE) habelə Vətən İttifaqı və Res Publica (IRL) etimadsızlıq rəyini dəstəklədiyini bildirmişdilər.

Baş nazirin istefası üçün ən azı 51 deputat etimadsızlıq rəyini dəstəkləməlidir.

Etimadsızlıq təşəbbüskarlarının fikrincə, Taavi Rıvays qətiyyyətsizliyi ilə Estoniyanı çıxılmaz vəziyyətə salıb. Onun rəhbərlik etdiyi hökumət ciddi və zəruri qərarlar qəbul edə bilməz.