Bakı. 28 iyun. REPORT.AZ/ Liviyanın qərbindəki Əz-Zaviyə şəhərində silahlılar tərəfindən girov götürülmüş BMT missiyasının 7 əməkdaşı azad edilib.
"Report"un məlumatına görə, bu barədə "Agence France Presse" Tripolinin prezident qvardiyasının nümayəndəsi Nəcmi ən-Nakuaya istinadən xəbər verib.
"Onlar azad ediliblər və hazırda təhlükəsiz şəraitdə Mitiqa hava limanına göndərilirlər" – deyə ən-Nakua agentliyə bildirib.
Qeyd edək ki, insident paytaxt Tripolidən 45 kilometr qərbdə yerləşən Əz-Zaviyə yaşayış məntəqəsində baş verib. BMT-nin missiyasının üzvlərini oğurlayanlar Səudiyyə Ərəbistanında həbs edilmiş tərəfdarlarının azad edilməsini tələb edirdilər.
***22:17
Liviyada BMT-nin missiyasının üzvlərini oğurlayanlar öz tələblərini irəli sürüblər.
"Report" "RİA Novosti"yə istinadən xəbər verir ki, silahlılar Səudiyyə Ərəbistanında həbs edilmiş tərəfdarlarının azad edilməsini tələb ediblər.
Məlumatda bildirilir ki, radikallar BMT-nin Ali Komissarının Qaçqınlar üzrə İdarəsinin 7 üzvünü oğurlayıblar. BMT üzvləri Tunisdən Liviyanın Əz-Zaviyə şəhərinə qeyri-leqal miqrantların saxlanıldığı mərkəzə yoxlama üçün göndəriliblər. Burada isə oğurlanıblar. Onların arasında əcnəbilər də var.
***20:03
"Əl-Qaidə" terror qruplaşmasının silahlıları BMT-nin Liviyadakı missiyasının üzvünü girov götürüb.
"Report"un məlumatına görə, bu barədə "Sky News" telekanalı xəbər verib.
Xəbərdə bildirilir ki, insident paytaxt Tripolidən 45 kilometr qərbdə yerləşən Əz-Zaviyə yaşayış məntəqəsində baş verib.
Girov götürülən şəxsin adı və hadisənin təfərrüatları açıqlanmır.