Bakı. 13 iyul. REPORT.AZ/ ABŞ prezidenti Donald Tramp Fransaya ilk səfərinə başlayıb. "Report" TASS-a istinadən xəbər verir ki, ABŞ dövlət başçısının təyyarəsi artıq Parisin Orli aeroportuna eniş edib.
Fransa prezidenti Emmanuel Makron qonağı tarixi Əlillər Evində qarşılamaq niyyətindədir. Rəsmi mərasimdən sonra onlar üz-üzə danışmaq üçün Sena çayının sağ sahilinə, Yelisey sarayına yollanacaqlar. Ardından dövlət başçılarına nümayəndə heyətlərinin üzvləri də qoşulacaq. Görüşün yekunları ilə bağlı mətbuata açıqlamalar veriləcək.
İyulun 14-də D.Tramp Fransa Milli Günündə Yelisey meydanında keçiriləcək hərbi paradda iştirak edəcək. Amerikalı lideri bu tədbirə Birləşmiş Ştatların Birinci dünya müharibəsinə daxil olmasının 100 illiyi ilə əlaqədar dəvət ediblər.