Cozef Bayden Si Szinpinin onunla görüşdən imtinası xəbərini təkzib edib

ABŞ prezidenti Cozef Bayden Çin Xalq Respublikasının sədri Si Szinpinin onunla görüşdən imtinası barədə məlumatın həqiqətə uyğun olmadığını bildirib.

“Report”un məlumatına görə, bu barədə “Reuters” agentliyi xəbər verib.

"ABŞ prezidenti Cozef Bayden çərşənbə axşamı jurnalistlərə bildirib ki, Si Szinpinlə ötən həftə telefon danışığı zamanı Çin rəhbərinin təkbətək görüşdən imtinası xəbəri həqiqətə uyğun deyil ", - agentlik bildirib.

Daha əvvəl mənbələrə istinadən Britaniyanın “Financial Times” qəzeti bildirib ki, Cozef Bayden Si Szinpinə təkbətək görüş keçirməyi təklif edib, ancaq bu təşəbbüs qəbul olunmayıb. Qəzetin məlumatına görə, Çin rəhbəri bunun əvəzinə rəsmi Vaşinqtonun Pekinlə bağlı daha yumşaq tonu qəbul etməsini təkid edib.