Yuxarı

Brüsseldə miqrant böhranı ilə bağlı təcili görüş keçirilir

görüşə Avropa İttifaqının 8 zərərçəkmiş üzv dövləti, eləcə də Serbiya və Makedoniya liderləri qatılıb

Bakı. 25 oktyabr. REPORT.AZ/ Avropada miqrant böhranı davam etdiyi bir vaxt Avropa İttifaqı və Balkan ölkələri rəhbərləri böhranı müzakirə etmək üçün bu gün Brüsseldə təcili iclas keçiriblər.

"Report"un "Amerikanın Səsi"nə verdiyi xəbərə görə, Avropa Komissiyasının prezidenti Jan-Klod Yunkerin təşəbbüsü ilə keçirilən görüşə Avropa İttifaqının 8 zərərçəkmiş üzv dövləti, eləcə də Serbiya və Makedoniya liderləri qatılıb.

Dünən Bolqarıstan, Rumıniya və Serbiya xəbərdarlıq edib ki, Suriya, İraq və Əfqanıstandan Avropaya kütləvi şəkildə gələn minlərlə miqrant üçün “bufer zona” olmaq fikrində deyillər. Bolqarıstanın baş naziri Boyko Borisov Rumıniya və Serbiya liderləri ilə danışıqdan sonra elan edib ki, əgər Almaniya, Avstriya və Qərbi Avropada olan digər ölkələr öz sərhədlərini bağlayarsa, onlar üçü də eyni vaxtda öz sərhədlərini bağlayacaqlar.

Aylardır ki, bu üç ölkə Avropaya üz tutan miqrantlar üçün tranzit yol rolunu oynayır.

Bir gün əvvəl isə BMT-nin İnsan Haqları Departamenti Çex Respublikasını miqrantları ləyaqəti alçaldan şəkildə həbs etməkdə günahlandırıb.

BMT sözçüsü bildirib ki, bir neçə mənbədən əldə olunan məlumata əsasən ölkədə miqantların haqları sistematik şəkildə pozulub.

Sözçü deyib ki, Çex Respublikası miqrantları 40 gün həbs edir və onları hər gün üçün $10.46 dollar cərimə edir.

Çex Respublikasının preizdenti Miloş Zeman miqrantlara qarşı pis rəftar haqda yayılmış məlumatları təkzib edib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi