BMT-nin mənzil-qərargahı iyul ayından etibarən əyani iş rejiminə keçəcək

Sanitar məhdudiyyətlərin aradan qaldırılması fonunda BMT-nin Nyu-Yorkda yerləşən mənzil-qərargahının əməkdaşları iyulun 6-dan etibarən tədricən əyani iş rejiminə keçməyə başlayacaq.

“Report” TASS-a istinadən xəbər verir ki, bu barədə BMT-nin Baş katibi Antoniu Quterreşin təşkilatın əməkdaşlarına ünvanlanmış məktubunda deyilir.

Sənəddə qeyd olunur ki, son aylar ərzində şəhərdə koronavirusa yoluxma halları azalıb.

Quterreş bildirib ki, iyulun 6-dan etibarən BMT-nin Nyu-Yorkda yerləşən mənzil-qərargahı əyani iş rejiminə keçmək üçün bütün tələblərə cavab verəcək:

“Bu, o deməkdir ki, 2020-ci ilin martında təsdiq edilmiş alternativ iş cədvəlinə uyğun olaraq, həftədə 5 iş günü uzaqdan işləyən bütün işçi heyətinin 2021-ci il iyulun 6-dan etibarən tədricən iş yerlərinə qayıtması gözlənilir”.

Quterreş gələcəkdə təşkilatın işçi heyətinin iş cədvəlinin tərtib edilməsi zamanı uzaqdan iş rejiminin bir çox üstünlüklərinin nəzərə alınacağına əmin olduğunu bildirib.