Berlin Prokurorluğu Almaniyanın müdafiə nazirinin fəaliyyətini yoxlamağa başlayıb

Bakı. 18 oktyabr. REPORT.AZ/ Berlin Prokurorluğu Almaniyanın müdafiə naziri Ursula fon der Lyayen barəsində qurumun işinə kənardan həddindən artıq məsləhətçinin cəlb edilməsi səbəbinə görə istintaqaqədərki yoxlamaya başlayıb.

Bu barədə "Report" TASS-a istinadən məlumat verir.

"Spiegel Online" nəşri yazır ki, hazırda prokurorluq nazirliyin işinə kənardan mütəxəssislərin cəlb olunmasında qəsdən saxta iş olub-olmadığını yoxlayır. Belə ki, sentyabrın 30-da fon der Lyayenə qarşı vəziyyətdən xəbərdar olan və çox güman, elə Müdafiə Nazirliyində çalışan hansısa insayderdən şikayət daxil olub. Şikayətdə bildirilir ki, məsləhətçilər nazirliyin işinə uzun müddət ərzində daxili əməkdaşlar kimi cəlb ediliblər.

Bənzər şübhələr daha əvvəl Federal Hesablama Palatasında da yaranıb və onlar gizli hesabatlarında Müdafiə Nazirliyinin, məsələn, informasiya texnologiyaları sahəsində müasirləşdirmə məsələlərində tamamilə kənar məsləhətçilərdən asılı olduğunu vurğulayıblar. Özü də onlarla müqavilələrin əksər hallarda rəqabətsiz əsasda və iqtisadi baxımdan faydalı olmadan bağlandığı iddia edilib.

"Spiegel Online" qeyd edir ki, fon der Lyayen Bundesverin qeyri-kafi texniki təminatı məsələsində elədiyi kimi, bu dəfə xətaları sələflərinin ayağına yaza bilməyəcək.