Belçikanın aldığı tibbi maskalar keyfiyyətsiz çıxıb

Belçika tərəfindən alınan üç milyon tibbi maska istifadə üçün yararsız hesab edilib.

“Report” xəbər verir ki, bunu ölkənin telekommunikasiya naziri Filip de Baker yerli “LN24” kanalına açıqlamasında deyib.

Onun sözlərinə görə, tibbi maskalar insanların müdafiəsini kifayət qədər təmin etmirlər.

“Söhbət xəstəxanalarda istifadə olunan və yüksək qoruyucu xüsusiyyətlərə malik olan “FFP2” maskalarından gedir. Bununla birlikdə, müvafiq olaraq tibbi maskaların etiketi olmayıb və laboratoriya müayinələri də onların yararsız olduğunu sübut edib”-deyə, nazir bildirib.

Qeyd edək ki, tibbi maskalar 23 mart tarixində Belçika Səhiyyə Təşkilatı tərəfindən sifariş edilib.

Belçikada fərdi qoruyucu vasitələrin çatışmazlığı mövcuddur.

Ölkədə koronavirus xəstəliyi nəticəsində 2 523 nəfər dünyasını dəyişib, yoluxanların ümumi sayı isə 25 minə yaxındır.