Bakı. 12 oktyabr. REPORT.AZ/ BMT-nin baş katibi Antoniu Quterriş təşkilatın 2018-2019-cu illər üzrə büdcəsi ilə bağlı təkliflərini Baş Assambleyanın 72-ci sessiyasının Beşinci Komitəsinin nümayəndə heyətinə təqdim edib.
"Report" xəbər verir ki, məlumatı BMT-nin mətbuat xidməti yayıb.
Baş katib iki illik büdcənin 5,4 milyard dollar olmasını və bu formada təsdiqlənməsini xahiş edib. Bu, 2016-2017-ci illər üçün ayrılmış büdcədən 200 milyon dollar və ya 4 faiz azdır.
Baş katib Beşinci Komitənin nümayəndə heyətindən 9998 vəzifədən ibarət ştat cədvəlini təsdiqləməyi də xahiş edib. Bu, ümumilikdə indiki ştat cədvəlindən 92 vəzifə azdır.
Ümumilikdə BMT-də 175 vəzifə ləğv ediləcək. Bu ixtasarlar 79 yeni vəzifənin yaradılmssı ilə qismən kompensasiya olunacaq.
A.Quterriş tezliklə Baş Assambleyaya BMT-də islahatlarla bağlı təkliflərini təqdim edəcəyini bildirib: "İslahatlarla bağlı təkliflər 2018-2019-cu illər üçün nəzərdə tutulan büdcəyə təsir etməyəcək".
Onun sözlərinə görə, islahatlar layihəsi təsdiqlənəcəyi təqdirdə, sənəd 2020-ci ildən qüvvəyə minəcək.
Xatırladaq ki, BMT-nin müntəzəm büdcəsi təşkilata üzv dövlətlərin ianələri hesabına formalaşır. İanənin həcmi BMT-nin ümumi xərclərindən asılı olaraq, faiz göstəricisi ilə müəyyən olunur.