Bakı. 22 sentyabr. REPORT.AZ/ Almaniya Dəmiryolu Şirkəti "Deutsche Bahn"ın operatoru Münhen (Almaniya) - Zaltsburq (Avstriya) - Vyana (Avstriya) - Budapeşt (Macarıstan) istiqamətində qatarların hərəkətini oktyabrın 4-dək dayandırıb.
"Report" xəbər verir ki, bu haqda "France Presse" agentliyi məlumat yayıb.
Buna səbəb kimi mühacir axını göstərilib.
Bir müddət öncə "Avstriya dəmiryolları" Zaltsburqla Almaniya sərhədi arasındakı qatarların hərəkətinı dayandırmışdı. Şirkət bunu Almaniya hakimiyyətinin istəyi əsasında etdiyini bildirmişdi. Bu reys sentyabrın ortalarında suriyalı qaçqınların axını səbəbindən dayandırılmışdı. Həmin vaxt şirkət nəqliyyatın normallaşacağı müddəti açıqlamamışdı.