Bakı. 26 may. REPORT.AZ/ Cənub-Şərqi Asiya Ölkələri Assosiasiyası (ASEAN) müdafiə nazirlərinin Laosda keçirilmiş görüşündə əsas müzakirə mövzusu terrorizmə qarşı mübarizə və Cənubi Çin dənizində yaranmış vəziyyət olub.
"Report" xəbər verir ki, bu barədə "Channel News Asia" telekanalı məlumat yayıb. Məlumata görə, toplantı iştirakçıları görüşün birinci gününün nəticələri ilə bağlı birgə bəyannamə qəbul ediblər. Sənəddə region ölkələrinin terrorizmlə mübarizə sahəsində əməkdaşlıq etməsi vurğulanır.
Bəyannamədə eyni zamanda dənizlərdə beynəlxalq razılaşmalara əməl etmək, qarşıdurmalardan yayınmaq qeyd edilir.
Qeyd edək ki, ASEAN-da Bruney, Vyetnam, İndoneziya, Kamboca, Laos, Malayziya, Myanma, Sinqapur, Tailand və Filippin təmsil olunur.