Bakı. 5 aprel. REPORT.AZ/ Almaniya hökuməti sosial şəbəkələri nifrəti qızışdıran və ya istifadəçiləri çaşdıran xəbərləri silməyə məcbur edən qanun layihəsini təsdiqləyib.
"Report" TASS-a istinadən xəbər verir ki, sənəd ölkənin Nazirlər Kabinetinin iclasında qəbul edilib və qüvvəyə minməsi üçün parlament tərəfindən dəstəklənməlidir.
Almaniyanın ədliyyə naziri Hayko Maas bildirib ki, sosial şəbəkələrin administratorları platformalarında belə məlumatların yayılmasına görə məsuliyyət daşımalıdırlar.
Qanun layihəsinə əsasən, istifadəçilərdən müvafiq şikayət daxil olduqdan sonra 24 saat ərzində məlumat silinməlidir. Əks halda, sosial şəbəkələr 50 milyon avroya qədər cərimə ilə üzləşə bilər.
Eyni zamanda, nazir qanun layihəsinin bu və ya digər formada dövlət senzurası olmadığını bildirib.