Almaniya Bundestaqının sədri Ukraynaya səfər edib

Almaniya Bundestaqının sədri Berbel Bas Ukraynaya səfər edib.

"Report" xəbər verir ki, bu barədə Bundestaq katibliyinin rəhbəri Enriko Briss tviter hesabında yazıb.

O, İkinci Dünya Müharibəsinin başa çatmasına həsr olunmuş anım tədbirlərində iştirak edəcək. Onun Prezident Volodimir Zelenski ilə də görüşü planlaşdırılır.

Bundestaqın rəhbəri Ukraynaya Ali Radanın spikeri Ruslan Stefançukun dəvəti ilə gəlib.

Xatırladaq ki, bir müddət əvvəl Ukrayna Prezidenti Volodimir Zelenski Almaniya kansleri Olaf Şolts və federal prezident Frank-Valter Ştaynmayeri Kiyevə dəvət edib.