ABŞ-nin B-52 bombardmançı təyyarəsi ilk dəfə Cənubi Koreya aviabazasına eniş edəcək

ABŞ-nin B-52 strateji bombardmançı təyyarəsi bu həftə ilk dəfə Cənubi Koreyanın aviabazasına enəcək.

"Report" xəbər verir ki, bu barədə "Yonhap" agentliyi mənbələrə istinadən məlumat yayıb.

Bunun Şimali Koreyanın kəskin reaksiyasına səbəb olacağı gözlənilir.

Qeyd olunub ki, Amerika bombardmançısının Koreya yarımadasının cənubuna yerləşdirilməsi, Vaşinqton və onun müttəfiqlərinin fikrincə, Pxenyandan gələn nüvə təhlükəsi və onun növbəti cəhdi fonunda ABŞ-nin regionda mövcudluğuna sadiqliyini nümayiş etdirəcək. KXDR oktyabrda hərbi kəşfiyyat peykini buraxmağı planlaşdırır.

B-52 Cənubi Koreyaya enərsə, bu, ilk belə hal olacaq. Bundan əvvəl bu strateji bombardmançı təyyarələr təlimlər çərçivəsində yalnız Koreya yarımadası üzərində uçuşlar həyata keçirib.