​İsveç parlamentinə Xocalı soyqırımı ilə əlaqədar müraciət ünvanlanıb

Bakı. 26 fevral. REPORT.AZ/ Azərbaycan Federasiyası-İsveç Xocalı soyqırımının 23-cü ildönümü ilə əlaqədar burada yaşayan azərbaycanlılar adından İsveç parlamentinə Ermənistanın Azərbaycana qarşı işğalçılıq siyasətini pisləyən müraciət ünvanlayıb.

“Report” Diasporla İş üzrə Dövlət Komitəsinin mətbuat xidmətinə istinadən xəbər verir ki, müraciətdə 1992-ci il fevralın 25-dən 26-na keçən geçə 366-cı alayın dəstəyi ilə Ermənistan hərbi hissələrinin dinc Xocalı əhalisinə qarşı törətdiyi vəhşilik qeyd olunub. Hücum zamanı ümumilikdə 613 günahsız insanın qətlə yetirildiyi, onlardan 106 nəfərin qadın, 70 nəfərin yaşlı və qoca, 63 nəfərin isə uşaq olduğu, həmçinin 150 şəxsin aqibəti haqqında hələ də heç bir məlumat əldə edilməməsi, 1275 şəxsin isə girov götürüldüyü qeyd olunub.

Müraciətdə Xocalı soyqırımından 23 il keçməsinə baxmayaraq, bu illər ərzində İsveç dövlətində və cəmiyyətində bu haqda məsələ qaldırılmadığı, İsveç hökumətinin bu soyqırıma dair mövqe bildirmədiyi vurğulanıb. 

Sənəddə həmçinin Azərbaycan Federasiyası-İsveç parlamentə müraciət edərək, 1992-ci il 26 fevral tarixində baş verən qətliamın azərbaycanlılara qarşı törədilmiş soyqırımı kimi tanınmasını, həmçinin Azərbaycanın bir milyon qaçqın və köçkünün öz evlərinə qayıtması üçün Ermənistana qarşı sanksiyalar qəbul edilməsi tələb olunub.