Dövlət Komitəsi: Azərbaycan icması ümid edir ki, Rusiya məhkəməsi ÜAK-la bağlı ədalətli qərar çıxaracaq

Bakı. 3 aprel. REPORT.AZ/ "Rusiya Federasiyası Ədliyyə Nazirliyinin Ümumrusiya Azərbaycan Konqresinin ləğv edilməsi üçün Ali Məhkəməyə müraciət etməsi barədə kütləvi informasiya vasitələrində yayılan məlumat Azərbaycan ictimaiyyətinin, eyni zamanda Rusiyadakı çoxmilyonluq Azərbaycan diasporunun ciddi narahatlığına səbəb olub".

"Report"un xəbərinə görə, bu barədə Azərbaycan respublikası Diasporla İş üzrə Dövlət Komitəsinin yaydığı açıqlamada bildirilib.

Qeyd olunub ki, Azərbaycan xalqının ümummilli lideri Heydər Əliyevin və Rusiya Federasiyasının Prezidenti Vladimir Putinin dəstəyi ilə 2001-ci ildə yaradılan ÜAK ötən müddət ərzində Rusiya Fеdеrasiyasında yaşayan azərbaycanlıların bir-biri ilə mədəni-mənəvi əlaqələrinin qurulması, soydaşlarımızın Rusiya cəmiyyətinə intеqrasiyası və iki ölkə arasında münasibətlərin inkişafı sahəsində mühüm işlər görüb. ÜAK Azərbaycan həqiqətlərinin yеrli ictimaiyyətə çatdırılması, milli-mədəni irsimizin tanıdılması, sоydaşlarımız arasında milli həmrəyliyin gücləndirilməsinə yönələn bir sıra uğurlu layihələrə imza atıb.

"Azərbaycan və Rusiyanın müvafiq dövlət оrqanları ilə qarşılıqlı еtimada dayanan səmərəli əməkdaşlıq əlaqələri qurmağa müvəffəq olan ÜAK-ın fəaliyyəti хalqlarımızı birləşdirən çохəsrlik dоstluq ənənələrinə əsaslanıb, ölkələrimiz arasındakı stratеji tərəfdaşlıq münasibətlərinin daha da dərinləşməsinə töhfə verməyə xidmət edib. Təsadüfi deyildir ki, ÜAK-ın II qurultayında Prezident İlham Əliyev və Rusiya Federasiyasının Prezidenti Vladimir Putin iştirak edərək, geniş nitq söyləyib, təşkilatın fəaliyyətinin əhəmiyyətini və iki ölkə arasında əlaqələrin inkişafında rolunu yüksək qiymətləndirib. Bu, hər iki dövlətin ÜAK-ın fəaliyyətinə verdiyi yüksək dəyərin bariz ifadəsidir.

ÜAK daim fəaliyyətini Rusiya Federasiyasının qanunları çərçivəsində qurmağa çalışıb, ölkədə mövcud olan dini və etnik tolerantlığın möhkəmlənməsinə, millətlərarası dostluğun, mədəniyyətlərarası dialoqun dərinləşməsinə öz töhfəsini verməyə səy göstərib zəruri məqamlarda iqtisadi tərəqqinin, ictimai-siyasi sabitliyin tərəfdarı kimi prinsipial və ardıcıl mövqe nümayiş etdirub. Rusiyanın milli və dövlət maraqları təşkilatın fəaliyyətinin əsas və dəyişilməz prioriteti olub.

Bütün bunlar, dünyada və regionda mürəkkəb, ziddiyyətli proseslərin getdiyi indiki şəraitdə ÜAK-ın fəaliyyətinin dayandırılmasının heç də iki ölkənin maraqlarına xidmət etmədiyini çox aydın şəkildə nümayiş etdirir. ÜAK-ın ləğv olunması, yaxud onun ictimai nüfuzunun zədələnməsinə yönələn təşəbbüslər xalqlarımız arasında qarşılıqlı etimada əsaslanan çoxəsrlik dostluq ənənələrinin, habelə Azərbaycan-Rusiya strateji tərəfdaşlıq münasibətlərinin ruhuna ziddir və bu münasibətlərin inkişafında maraqlı olmayan qüvvələrin mənafelərinə xidmət edə bilər", - Dövlət Komitəsinin açıqlamasında vurğulanıb.

Qeyd olunub ki, Azərbaycan ictimaiyyəti, eyni zamanda Rusiyada yaşayan çoxmilyonlu Azərbaycan icması ümid edir ki, Rusiya Federasiyasının müvafiq qurumları obyektiv, ədalətli, iki ölkənin milli maraqlarına uyğun qərar qəbul edəcək və Rusiya azərbaycanlılarını öz ətrafında birləşdirən ÜAK bundan sonra da həmvətənlərimiz arasında mədəni- mənəvi birliyin və bütövlükdə Rusiya-Azərbaycan dostluğunun möhkəmlənməsində, ikitərəfli münasibətlərin inkişafında mühüm rola malik bir təşkilat kimi uğurla fəaliyyət göstərəcək.