Son yeddi ildə Azərbaycan vətəndaşlığına qəbul edilən şəxslərin sayı açıqlanıb

Bakı. 19 mart. REPORT.AZ/ "Ötən il müraciətlər əsasında 885 şəxsin ölkə ərazisində müvəqqəti olma müddəti uzadılıb, 53 200 şəxsə və onunla birlikdə immiqrasiya edən 18 yaşına çatmamış övladlarına Azərbaycanda müvəqqəti və 2 640 şəxsə daimi yaşama icazələri verilib". "Report"un məlumatına görə, bunu Dövlət Miqrasiya Xidmətinin rəisi Firudin Nəbiyev AZƏRTAC-da çıxan məqaləsində deyib.

Xidmət rəisinin sözlərinə görə, 2008-ci ildən indiyədək 1 434 nəfər Azərbaycan vətəndaşlığına qəbul edilib: "Bununla belə, bu müddətdə 36 467 şəxsin Azərbaycan vətəndaşlığına mənsubiyyəti tanınıb və onlar müvafiq dövlət qurumları tərəfindən Azərbaycan vətəndaşının şəxsiyyətini təsdiq edən sənədlərlə təmin edilib".

F. Nəbiyev qeyd edib ki, ötən il əcnəbilər və vətəndaşlığı olmayan 26 567 şəxs tərəfindən inzibati qanunvericiliyin pozulması halı aşkar edilib və müvafiq tədbirlər görülüb: "Ötən il əcnəbilər və vətəndaşlığı olmayan şəxslər tərəfindən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, əmək fəaliyyətinin həyata keçirilməsi üçün iş icazələrinin verilməsi və mövcud iş icazələrinin müddətlərinin uzadılması ilə bağlı ümumilikdə 105 550 şəxs tərəfindən müraciət daxil olub. Müraciətlərin hər biri ayrı-ayrılıqda qanunvericiliyin tələblərinə uyğun olaraq araşdırılıb və müvafiq qərarlar qəbul edilib".

O, eyni zamanda xatırladıb ki, ötən il ölkədə qalma müddətinə müvafiq olaraq, respublikamıza girişi qeydə alınmış əcnəbilərdən 670 326 nəfəri olduğu yer üzrə qeydiyyata alınıb.

"Əlbəttə, əldə olunan uğurların əsasını xidmətdə kadr siyasəti təşkil edir. Ötən il xidməti fəaliyyətlərində müsbət xarakterizə olunan 28 əməkdaş yuxarı təsnifatlar üzrə vəzifələrə irəli çəkilib, yaxşı iş göstəricilərinə nail olan 248 əməkdaşın əməyi fərqləndirilib" - deyə Xidmət rəisi əlavə edib.

Qeyd edək ki, bu gün Dövlət Miqrasiya Xidmətinin yaradılmasından 9 il ötür.