Rövşən Rzayev BMT İnkişaf Proqramının Azərbaycana yeni təyin olunan nümayəndəsi ilə görüşüb

Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev iyunun 14-də BMT İnkişaf Proqramının (BMTİP) Azərbaycana yeni təyin olunan rezident nümayəndəsi Alessandro Frakassetti ilə görüşüb.

Bu barədə "Report"a Dövlət Komitəsinin Mətbuat xidmətindən məlumat verilib. 

Dövlət Komitəsinin sədri əvvəlcə Alessandro Frakasettini yeni vəzifəyə təyin olunması münasibətilə təbrik edib.

Qonağa ölkəmizdə qaçqınlar və məcburi köçkünlərlə bağlı aparılan dövlət siyasətinin məqsəd və nəticələri, son vaxtlar həyata keçirilən tədbirlər barədə məlumat verilib. Bildirilib ki, Prezident İlham Əliyev bu kateqoriyadan olan şəxslərin sosial müdafiəsinin gücləndirilməsi, mənzil-məişət şəraitinin yaxşılaşdırılması ilə bağlı mühüm qərarlar qəbul edib. Onlar üçün salınan qəsəbələrin sayı ilbəil artır, hər il minlərlə məcburi köçkün ailəsi yeni mənzilə köçürülür. Birinci vitse-prezident xanım Mehriban Əliyeva məcburi köçkünlərin problemlərinin həllini diqqətdə saxlayır.

Alessandro Frakasetti səmimi qəbula və təbrikə görə təşəkkürünü bildirib.BMTİP-in Azərbaycandakı fəaliyyətində qaçqınlar və məcburi köçkünlərlə bağlı layihələrə böyük əhəmiyyət verildiyini vurğulayan qonaq bu sahədə əməkdaşlığın genişləndirilməsi üçün səyini əsirgəməyəcəyini bildirib.

Görüşdə qarşılıqlı maraq doğuran məsələlərlə bağlı fikir mübadiləsi aparılıb.