​VHP-nin növbəti qurultayının vaxtı məlum olub

Bakı. 21 yanvar. REPORT.AZ/ Vətəndaş Həmrəyliyi Partiyasının (VHP) növbəti qurultayı sentyabrın 26-da keçiriləcək.

Bu barədə "Report"a VHP-nin Mərkəzi İcra Aparatının rəhbəri Samir Əsədli məlumat verib.

O bildirib ki, indiyədək partiyanın 81 rayon təşkilatından 15-də Qurultaya Hazırlıq üzrə Təşkilat Komitəsinin konfransı keçirilib: "Rayon təşkilatlarındakı konfransları avqusta qədər yekunlaşdırmağı planlaşdırırıq. Planımız bundan ibarətdir ki, qurultay sentyabrın 26-da-partiyanın 24 illiyində olsun".

S.Əsədli deyib ki, partiya üzvlərinin əksəriyyəti hazırkı sədr Sabir Rüstəmxanlını dəstəkləyir.

Qeyd edək ki, VHP 1992-ci ildə təsis edilib.