Yuxarı

Milli Məclisin komitə üzvlərinin sayı azaldılacaq

Buna səbəb parlamentdə komitələrin sayının artırılmasıdır

Bakı. 30 noyabr. REPORT.AZ/ V Çağırış Milli Məclisin (MM) komitə üzvlərinin sayı azaldılacaq. "Report"un xəbərinə görə, buna səbəb parlamentdə komitələrin sayının artırılmasıdır.

lV Çağırış Milli Məclisinin Hüquq siyasəti və dövlət quruculuğu komitəsinin 11, Təhlükəsizlik və müdafiə komitəsinin 12, İqtisadi siyasət komitəsinin 14, Təbii ehtiyatlar, energetika və ekologiya komitəsinin 10, Aqrar siyasət komitəsinin 9, Sosial siyasət komitəsinin 11, Regional məsələlər komitəsinin 8, Elm və təhsil komitəsinin 13, Mədəniyyət komitəsinin 7, İnsan hüquqları komitəsinin 11, Beynəlxalq münasibətlər və parlamentlərarası əlaqələr komitəsinin 13 nəfər üzvü var idi.

V Çağırış Milli Məclisdə isə komitələrin sayı artırılıb, bəzilərinin də adında dəyişiklik edilib. İndiyədək MM-də 11 komitə olub, indi isə komitələrin sayı 15 olub.

Bundan başqa, 4 yeni komitə yaradılıb. Bunlar Səhiyyə komitəsi, Ailə, qadın və uşaq məsələləri komitəsi, İctimai birliklər və dini qurumlar komitəsi və Gənclər və idman komitəsidir.

Yeni tərkibdə Təhlükəsizlik və müdafiə komitəsi Müdafiə, təhlükəsizlik və korrupsiya ilə mübarizə komitəsi, İqtisadi siyasət komitəsi İqtisadi siyasət, sənaye və sahibkarlıq komitəsi, Sosial siyasət komitəsi Əmək və sosial siyasət komitəsi adlandırılıb.

Beləliklə, V çağırış MM-də komitə üzvlərinin sayı orta hesabla 8 olacaq.

Qeyd edək ki, MM-in komitələrinin tərkibi sabah - dekabrın 1-də açıqlanacaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi