Yuxarı

“İrəli” İctimai Birliyinin yaranmasının 7 illiyi münasibətilə tədbir keçirilib

Tədbirdə Azərbaycan Prezident Administrasiyasının nümayəndələri, millət vəkilləri iştirak edib

Bakı. 23 dekabr. REPORT.AZ/ Bu gün Beynəlxalq Muğam Mərkəzində “İrəli” İctimai Birliyinin yaranmasının 7 illiyi münasibətilə tədbir keçirilib. “Report”un məlumatına görə, tədbirdə Azərbaycan Prezident Administrasiyasının nümayəndələri, millət vəkilləri, qeyri-hökumət təşkilatlarının təmsilçiləri, ziyalılar və ictimaiyyət nümayəndələri iştirak edib.

Gənclər və idman nazirinin müavini İntiqam Babayev çıxış edərək deyib ki, “İrəli” İctimai Birliyi Azərbaycanın gənclər təşkilatları arasında daim öz dəsti-xətti ilə seçilib. O qeyd edib ki, təşkilat ətrafında xeyli aktiv gənc toplaşıb: “İctimai Birliyin tədbirlərində iştirak edirəm. Təşkilatda daim yeniliklərin, irəliləyişlərin olduğunu görürəm”.

İ.Babayev bildirib ki, Azərbaycanda həyata keçirilən siyasətin istiqamətlərindən biri də gənclər siyasətidir: “Yeni nəsil, gənclik daha aktivdirlər. Onlar həm ölkə daxilində, həm də beynəlxalq aləmdə ölkəmizi layiqincə təmsil edirlər. Gənclər vətəndaş olaraq öz fikirlərini müstəqil ifadə edirlər. Prezident İlham Əliyevin rəhbərliyi ilə yeni mərhələyə qədəm qoyulub. Azərbaycan güclü dövlət olaraq digər dövlətlərlə tərəf müqabilidir. Burada əsas iş gənclərin üzərinə düşür. Gənclər Azərbaycan siyasətinə öz töhfələrini verib, bundan sonra da verəcəklər”.

Prezident Administrasiyasının İctimai-siyasi məsələlər şöbəsinin Gənclər təşkilatları ilə iş sektorunun müdiri Vüsal Quliyev qeyd edib ki, yeni nəsil ictimai fəaliyyətdə daha aktivdir: “Azərbaycan hökuməti daim gənclərə dəstək verib. Bu siyasət bundan sonra da davam etdiriləcək. Fəxrlə deyə bilərəm ki, gənclər siyasətinin bəhrəsini görə bilirik. Ölkəmizdə gənclər üçün hər bir şərait yaradılıb, onların təşkilatlanması üçün maddi-texniki baxımdan işlər görülür. Özüm “İrəli” İctimai Birliyi ilə demək olar, sıx təmasdayam. Bu, nəzarət funksiyası deyil, dəstəkdir”.

Milli Məclisin Gənclər və idman komitəsinin sədri Fuad Muradov deyib ki, Azərbaycanda gənclərə yüksək şərait yaradılıb: “İnanıram ki, Azərbaycan gəncləri Dağlıq Qarabağda, Şuşada, Laçında da xeyli işlər görəcəklər”.

Azərbaycan Prezidenti yanında Gənclər Fondunun icraçı direktoru Fərhad Hacıyev bildirib ki, ölkədə 310 gənclər təşkilatı var: “İrəli” İctimai Birliyi isə fərqlənən gənclər təşkilatlarındandır. Ümumiyyətlə, Azərbaycan gəncliyi bütün sahələrdə öz sözünü deyib”.

“İrəli” İctimai Birliyinin sədri Mirhəsən Seyidov hesabatla çıxış edib. 

Sonra Prezident İlham Əliyevə müraciət edilib. Bildirilib ki, Azərbaycan gəncliyi inkişaf edir, baş verən proseslərlə bağlı öz sözünü deyir: “Biz gənclər əminik ki, Azərbaycanda gənclərə bundan sonra da geniş imkanlar yaradılacaq. Buna görə Prezident İlham Əliyevə təşəkkürümüzü bildiririk”.

Qeyd edək ki, İctimai Birlik 2008-ci ildə yaradılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi