Dövlət orqanlarının həyata keçirdiyi xidmətlərin Elektron Reyestrinin aparılması qaydaları müəyyənləşib

Bakı. 17 fevral. REPORT.AZ/ Nazirlər Kabineti “Dövlət orqanları tərəfindən həyata keçirilən xidmətlərin Elektron Reyestrinin aparılması Qaydaları”nı təsdiqləyib.

"Report"un xəbərinə görə, bu qaydalar dövlət orqanları tərəfindən həyata keçirilən xidmətlərin Elektron Reyestrinin formalaşdırılması, aparılması, istifadəsi və mühafizəsinin hüquqi və təşkilati əsaslarını müəyyən edir. Elektron Reyestrin aparılmasının əsas məqsədləri dövlət orqanlarının göstərdikləri xidmətlərin ümumi sayının və istiqamətlərinin (fiziki və hüquqi şəxslərə, dövlət orqanlarına və s.) müəyyən edilməsi, xidmətlər haqqında məlumatların vahid mənbədə toplanması və sistemləşdirilməsi, xidmət sahələri üzrə standartların və hər bir xidmətin reqlamentinin müəyyən edilməsi, xidmətlərin elektronlaşdırılması istiqamətində görülən işlərin sürətləndirilməsi və bu sahədə prioritet istiqamətlərin müəyyən edilməsi, xidmətlərin göstərilməsi üçün istifadə olunan informasiya sistemlərinin və informasiya ehtiyatlarının inteqrasiyasının təmin edilməsi, xidmətlərin təşkili üzrə dövlət xərclərinin səmərəli istifadəsi barədə təkliflərin verilməsidir. Elektron Reyestrin saxlanılması, fəaliyyəti və inkişafı üzrə xərclər dövlət büdcəsi və qanunvericiliklə qadağan edilməyən digər mənbələr hesabına maliyyələşdirilir. Reyestrin formalaşdırılmasını, aparılmasını, istifadəsini, mühafizəsini və bu istiqamətdə əlaqələndirməni təmin edən səlahiyyətli orqan Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyidir. Elektron Reyestrin aparılması üçün xidmət göstərən dövlət orqanları ilə qarşılıqlı informasiya mübadiləsi informasiya sisteminin istifadəçi interfeysi vasitəsilə təmin edilir. Elektron Reyestrin elektron anketlərinin metodiki tövsiyələrə uyğun doldurulması avtomatlaşdırılmış formal məntiqi yoxlama sistemi vasitəsilə təmin edilir. Reyestrə xidmətlər barədə məlumatların daxil edilməsi üçün xidmət göstərən dövlət orqanı elektron anketlərinin doldurulması üçün məsul şəxs təyin edir, məsul şəxs vasitəsilə məlumatları müəyyən edərək Reyestrin elektron anketlərini doldurur və elektron imza ilə təsdiq edir, Reyestrə daxil edilmiş məlumatların tamlığını və düzgünlüyünü mütəmadi yoxlayır, Reyestrin operatorundan bildiriş aldıqdan 7 iş günü ərzində Elektron Reyestrin elektron anketləri üzrə məlumatlarda müvafiq dəyişikliklər edərək onları yenidən göndərir, burada olan məlumatlarda dəyişikliklərin edilməsi və ya onların çıxarılması üçün Reyestrin operatoruna müraciət edir, yeni xidməti müəyyən edən normativ hüquqi aktın qüvvəyə mindiyi tarixdən 1 aydan gec olmayaraq Elektron Reyestrin müvafiq elektron anketləri üzrə məlumatları təqdim edir. Elektron Reyestrə xidmətlər barədə məlumatların daxil edilməsi üçün Reyestrin operatoru məlumatların təqdim edildiyi gündən 7 iş günü ərzində Reyestrin müvafiq elektron anketləri üzrə onların tamlığını və düzgünlüyünü yoxlayır, yoxlama zamanı çatışmazlıq aşkar edilmədikdə, məlumatları təyin etdiyi məsul şəxsin elektron imzası ilə təsdiq edir və Elektron Reyestrin müvafiq bölməsinə daxil edir, hər hansı çatışmazlıq aşkar edildikdə, bu barədə məlumatı təqdim etmiş dövlət orqanına 1 iş günü ərzində elektron formada bildiriş göndərir.