Bakı Şəhər Prokurorluğunda prokurorluq işçilərinin peşə bayramına həsr olunan tədbir keçirilib

Bakı Şəhər Prokurorluğunda prokurorluq işçilərinin peşə bayramına həsr olunan tədbir keçirilib Bakı Şəhər Prokurorluğunda Azərbaycan prokurorluğunun yaradılmasının 101-ci ildönümü və prokurorluq işçilərinin peşə bayramına həsr olunan tədbir keçirilib.
Daxili siyasət
1 Oktyabr , 2019 16:33
Bakı Şəhər Prokurorluğunda prokurorluq işçilərinin peşə bayramına həsr olunan tədbir keçirilib

Bakı Şəhər Prokurorluğunda Azərbaycan prokurorluğunun yaradılmasının 101-ci ildönümü və prokurorluq işçilərinin peşə bayramına həsr olunan tədbir keçirilib.

Baş Prokurorluqdan "Report"a verilən məlumata görə, tədbirdə çıxış edən Bakı şəhər prokuroru İlqar Abbasov ölkəmizdə ilk prokurorluq orqanının Azərbaycan Xalq Cümhuriyyətinin Nazirlər Şurasının 1 oktyabr 1918-ci il tarixli qərarı ilə Bakı Dairə Məhkəməsinin tərkibində yaradılmaqla fəaliyyətə başlamasını qeyd edərək Azərbaycan Prokurorluğunun keçdiyi mürəkkəb və şanlı inkişaf yolundan bəhs edib.

Xüsusilə vurğulanıb ki, ümummilli lider Heydər Əliyevin xalqın tələbi ilə siyasi hakimiyyətə qayıdışından sonra ölkə həyatının bütün sahələrində aparılan əsaslı islahatlar Azərbaycan prokurorluğunu da əhatə etməklə müasir tələblərə cavab verən orqan kimi formalaşdırılmasına başlanıb.

Bildirilib ki, Prezident İlham Əliyev tərəfindən prokurorluğa daim dövlət səviyyəsində diqqət və qayğı göstərilir, prokurorluq orqanlarının fəaliyyətinin və strukturunun təkmilləşdirilməsi, kadr potensialının gücləndirilməsi, yeni nəsil prokurorların formalaşdırılması və peşəkarlığının artırılması, habelə prokurorluğun maddi-texniki bazasının möhkəmləndirilməsi və işçilərinin sosial müdafiəsinin yüksəldilməsi məqsədilə Dövlət başçısının sərəncamı ilə təsdiq edilən Dövlət proqramı bu dövlət orqanının müasir dövrün tələbləri səviyyəsində inkişafında xüsusi əhəmiyyətə malik olub. Prokurorluğun maddi-texniki bazasının möhkəmləndirilməsi sahəsində görülən işlər sırasında peşə bayramı ərəfəsində Səbail rayon prokurorluğunun müasir standartlara cavab verən yeni inzibati binasının tikilərək əməkdaşların istifadəsinə verilməsi xüsusi qeyd edilib.

Diqqətə çatdırılıb ki, respublikada davamlı şəkildə həyata keçirilən hüquqi islahatların nəticəsi olaraq Bakı Şəhər Prokurorluğu da inkişaf yolu keçməklə öz fəaliyyətini təkmilləşdirmiş və qarşısında dayanan vəzifələrin yerinə yetirilməsi istiqamətində uğurlu nəticələr əldə edilib. Azərbaycan Respublikasının Prezidenti İlham Əliyevin göstəriş və tövsiyələrinə uyğun olaraq, həyata keçirilən köklü islahatlar Azərbaycan prokurorluğunu və onun tərkib hissələrindən olan Bakı Şəhər Prokurorluğunu insan hüquq və azadlıqlarının layiqli müdafiəçisinə çevirən etibarlı dövlət orqanı kimi formalaşdırıb.

Tədbirdə çıxış edən Bakı şəhər prokurorunun müavini Azər Əsgərov prokurorluq orqanlarının keçdiyi şərəfli tarixdən, prokurorluğa göstərilən dövlət qayğısından bəhs edərək prokurorluq orqanlarının dövlət orqanları sistemindəki rolunu diqqətə çatdırıb.

Bakı şəhər prokuroru İlqar Abbasov yekunda prokurorluq orqanları işçilərinin peşə bayramı günü münasibəti ilə prokurorluq işçilərini bir daha təbrik edərək, prokurorluğa göstərilən diqqət və qayğıya görə Prezident İlham Əliyevə minnətdarlığını bildirib.

İ.Abbasov əmin edib ki, Bakı Şəhər Prokurorluğu bundan sonra da dövlətçiliyimizin, suverenliyimizin qorunması, insan və vətəndaş hüquq və azadlıqlarının təmin edilməsi, cinayətkarlığa qarşı mübarizə, qanunçuluğun və hüquq qaydasının möhkəmləndirilməsi sahəsində yüksək məsuliyyət hissi ilə çalışacaqdır.

Tədbirin sonunda Baş prokurorun müvafiq əmri ilə barələrində həvəsləndirmə tətbirləri tətbiq edilmiş əməkdaşlara mükafatlar təqdim edilib.

Son xəbərlər

Orphus sistemi