Bakı Beynəlxalq Multikulturalizm Mərkəzində 20 Yanvar şəhidləri yad edilib

Bakı Beynəlxalq Multikulturalizm Mərkəzində 20 Yanvar şəhidləri yad edilib "Vətən övladlarının yazdığı milli tariximizlə qürur duyuruq”
Daxili siyasət
507
19 Yanvar , 2017 20:47
Bakı Beynəlxalq Multikulturalizm Mərkəzində 20 Yanvar şəhidləri yad edilib

Bakı. 19 yanvar. REPORT.AZ/ Bakı Beynəlxalq Multikulturalizm Mərkəzində (BBMM) 20 Yanvar şəhidlərinin xatirəsinə həsr olunmuş toplantı keçirilib.

Mərkəzdən "Report"a verilən məlumata görə, BBMM-in icraçı direktoru Azad Məmmədov 1990-cı il yanvarın 19-dan 20-nə keçən gecə keçmiş SSRİ rəhbərliyinin göstərişi ilə sovet hərbi birləşmələrinin Azərbaycan xalqına dəhşətli faciə yaşatdığını qeyd edib. İcraçı direktor bu faciəni eyni zamanda Azərbaycan xalqının müstəqillik uğrunda mübarizə tarixində yeni səhifə kimi səciyyələndirib. Azad Məmmədov bildirib ki, 20 Yanvar faciəsində qətlə yetirilənlərin arasında digər xalqların nümayəndələri də olub, bu isə bir daha sübut edir ki, vahid vətənin suverenliyi və bölünməzliyi uğrunda Azərbaycan xalqı həmişə həmrəy olub, birlik nümayiş etdirib.

Mərkəzin aparat rəhbəri, professor Aytən Qəhrəman qanlı gecənin dəhşətli statistikasından söz açıb: “Sovet qoşunlarının qanunsuz yeridilməsi nəticəsində Bakıda və Azərbaycan rayonlarında 146 nəfər öldürülüb, 744 nəfər yaralanıb, 841 nəfər qanunsuz həbs olunub, hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlak məhv edilib. Həlak olanların arasında qadınlar, uşaqlar və qocalar, həmçinin təcili yardım işçiləri və milis nəfərləri olub".

O bildirib ki, öncədən düşünülüb hazırlanmış bu təcavüzkarlıq aksiyası Azərbaycan xalqının demokratiya və milli azadlıq uğrunda mübarizəsini boğmaq, xalqı təhqir edərək ona mənəvi zərbə vurmaq məqsədi ilə gerçəkləşdirilib: "Xalqın azadlıq istəyinə qarşı yönələn bütün təcavüzlərə, zorakılıqlara və faciələrə baxmayaraq aradan keçən 27 il ərzində, heç bir şey suveren, sabit iqtisadiyyata, mütəşəkkil orduya malik və ümumxalq birliyinə müvəffəq olan güclü Azərbaycanın formalaşmasına mane ola bilmədi. Ona görə də biz indi - 27 il geriyə dönüb baxdığımızda 20 Yanvarda Azərbaycanın müstəqilliyi uğrunda şəhid olan, canını əsirgəməyən vətən övladlarının yazdığı milli tariximizlə qürur duyuruq”. 

Son xəbərlər

Orphus sistemi