Azərbaycanın qərb bölgəsində Heydər Əliyevin xatirəsi anılıb

Gəncə şəhərində və ətraf rayonlarda Azərbaycan dövlətinin memarı və qurucusu, dünya şöhrətli siyasi xadim, xalqımızın Ümummilli Lideri Heydər Əliyevin xatirəsi anılıb.

"Report"un Qərb bürosunun məlumatına görə, Gəncə şəhərində Heydər Əliyevin vəfatının 20-ci ildönümü böyük ehtiramla anılıb, Ulu Öndərin mərkəzi meydanda ucaldılmış abidəsi ziyarət olunub.

Anım mərasimində şəhər rəhbərliyi, Türkiyənin Gəncədəki Baş konsulluğunun əməkdaşları, hüquq-mühafizə orqanlarının, idarə və təşkilatların rəhbərləri, ictimaiyyət nümayəndələri iştirak ediblər.

Ümummilli Lider Heydər Əliyevin Daşkəsən, Gədəbəy, Ağstafa, Samux və digər rayonlarda da xatirəsi yad edilib, Ulu Öndərin rayon mərkəzlərində ucaldılmış abidələri önünə güllər düzülüb.

Hazırda bölgədə silsilə tədbirlər davam etdirilir.