Yuxarı

Azərbaycanda prokurorluq işçisinin intizam məsuliyyətinə cəlb olunması qaydasında dəyişiklik edilir

İntizam xətası törədildiyi gündən üç il keçdikdə prokurorluq işçisinə intizam tənbehi verilə bilməz

Bakı. 8 iyun. REPORT.AZ/ Azərbaycanda prokurorluq işçisinin intizam məsuliyyətinə cəlb olunması qaydasında dəyişiklik edilir.

“Report”un xəbərinə görə, bununla bağlı “Prokurorluq orqanlarında qulluq keçmə haqqında” qanuna dəyişiklik edilməsi təklif olunub.

Dəyişiklik layihəsinə əsasən, intizam xətası törədildiyi gündən üç il keçdikdə prokurorluq işçisinə intizam tənbehi verilə bilməz. Hazırda bu müddət bir ildir.

Təklif olunan daha bir dəyişikliyə görə intizam məsuliyyətinin növləri də artırılır. Belə ki, xidməti intizamı pozduğuna, vəzifələrini layiqincə yerinə yetirmədiyinə, həmçinin “Azərbaycan Respublikası Prokurorluğu İşçilərinin Etik Davranış Kodeksi”nin tələblərinə əməl etmədiyinə görə prokurorluq işçilərinə intizam tənbehləri tətbiq ediləcək.

Qanuna dəyişikliklər prokurorluq işçilərinin nizam-intizam tədbirlərinin gücləndirmək məqsədi ilə beynəlxalq təcrübəyə əsaslanaraq təklif olunub.

Qeyd edək ki, Məcəlləyə təklif edilən dəyişiklik layihəsi Milli Məclisin iyunun 14-də keçiriləcək növbədənkənar plenar iclasına tövsiyə edilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi