Yuxarı
    Bağlamaq

    AXCP sədrinin müavini: “Müsavat Partiyasının üzvləri bu cür söz-söhbətlə məşğul olmaqdansa, mitinqə hazırlaşsınlar”

    Gözəl Bayramlı: “Milli Şuranın keçirəcəyi mitinqlər kiminsə aksiyalarına əngəl törədə bilməz”

    Bakı. 13 sentyabr. REPORT.AZ/ "Biz Müsavat Partiyasına uğurlar arzu edirik. Bu cür söz-söhbətlərdənsə, Müsavat Partiyasının üzvləri mitinqə hazırlaşsınlar".

    Bunu "Report"a açıqlamasında Milli Şurada təmsil olunan Azərbaycan Xalq Cəbhəsi Partiyasının (AXCP) sədr müavini Gözəl Bayramlı deyib.

    O xatırladıb ki, bir müddət əvvəl Milli Şura sentyabrın 26-na təyin edilən referendumu müzakirə edərək mitinqlərin keçirilməsi barədə qərar qəbul edib: "Əvvəlcədən bəlli idi ki, Milli Şura bir neçə mitinq keçirəcək. Biz bir mitinqlə kifayətlənə bilmərik. Referenduma qədər, yəni sentyabrın 25-dək mitinq keçirməyi planlaşdırmışıq. Müsavat Partiyası da sentyabrın 18-nə mitinq təyin etdi. Biz də sentyabrın 18-nə mitinq təyin etməyi doğru hesab etmədik. Ona görə də mitinqi sentyabrın 17-də keçirmək qərarına gəldik. Bakı Şəhər İcra Hakimiyyətinə bununla bağlı müraciət də etmişik. Sadəcə, Bakı Şəhər İcra Hakimiyyətinə müraciət etdikdən sonra aksiyanı sentyabrın 11-də keçirilən mitinqdə iştirakçılarla razılaşdırmaq barədə qərar qəbul etmişdik. Belə də oldu".

    AXCP sədrinin müavini qeyd edib ki, Milli Şuranın keçirəcəyi mitinqlər kiminsə aksiyalarına əngəl törədə bilməz: "Yəni, digər təşkilatlar da mitinq keçirsələr, yaxşı olar. Amma bu, o anlama gəlməməlidir ki, Milli Şura qərar verərkən Müsavat Partiyasının sentyabrın 18-nə mitinq təyin etdiyini nəzərə almalı idi. Milli Şura qərarlarını sərbəst verir. Biz qərar verərkən digər təşkilatlarla məsləhətləşməmişik".

    Qeyd edək ki, Milli Şura sentyabrın 11-də mitinq keçirib. Həmin mitinqdə sentyabrın 17-də də növbəti aksiyanın keçiriləcəyi elan edilib. Müsavat Partiyası da sentyabrın 18-nə mitinq təyin edib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi