Bakı. 17 may. REPORT.AZ/ ADA Universitetində gənclərin siyasi, sosial və hüquqi biliklərinin hərtərəfli inkişaf etdirilməsi məqsədilə "AVO MUN 2018" layihəsi keçirilir.
"Report" xəbər verir ki, layihənin təşkilatçıları “ASAN Könüllüləri” Təşkilatı və “Gilan Holding"dir, ADA Universiteti və BMT-nin İnkişaf Proqramının Azərbaycan nümayəndəliyi (UNDP Azerbaijan) isə dəstək verirlər.
Tədbirdə Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, ASAN Könüllüləri" Təşkilatının sədri Bəxtiyar İslamov, BMT-nin İnkişaf Proqramının Azərbaycan nümayəndəliyinin rəhbəri Məzahir Əfəndiyev və başqaları iştirak ediblər.
"ASAN Könüllüləri" Təşkilatının sədri Bəxtiyar İslamov bildirib ki, layihənin əsas məqsədi gənclərin hüquqi, siyasi və ictimai biliklərinin inkişaf etdirilməsidir: "Bu layihədə 75 nəfər iştirak edir və bu gənclər üç gün ərzində fərqli mövzular ətrafında ictimai, siyasi müzakirələr aparacaq".
Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib ki, indiyədək "Asan Könüllüləri" Təşkilatı tərəfindən 300-ə yaxın layihə həyata keçirilib və bu layihələr də, ümumilikdə, 30 minə yaxın gənci əhatə edib. Ü.Mehdiyev qeyd edib ki, bu layihə gənclərin beynəlxalq hüququ mənimsəməsində faydalı olacaq. O, layihə çərçivəsində müzakirə ediləcək mövzulara toxunaraq Dağlıq Qarabağ münaqişəsinin Azərbaycanın uzun illərdir həll olunmayan yeganə problemi olduğunu söyləyib: "Bizim ən böyük uğurumuz odur ki, Dağlıq Qarabağda yaşamayan gəncliyimizin mövqeyi birmənalıdır və onlar əzmlidir".
Məzahir Əfəndiyev vurğulayıb ki, bu layihə Azərbaycanın inkişafına yönəlik atılan tədbirlərdə öz töhfəsini verəcək: "Dünyada artıq "Davamlı inkişaf"la bağlı yeni çağırış mövcuddur. Bu çağırış istiqamətində davamlı inkişafın məqsədlərinə cavab verən 17 gənc seçiləcək. Bizim növbəti məqsədimiz könüllülər hərəkatının daha çox inkişafını təmin etməkdir. Dünya dinamik olaraq inkişaf edir və bu müddətdə Azərbaycanın müxtəlif sahələrində inanılmaz dərəcədə inkişaf müşahidə edilir. Mən düşünürəm ki, könüllülər haqqında qanun yenidən işlənilib, ya da təkmilləşdirilməlidir. Könüllülər hərəkatının regionlara yayılmasını, bu prosesdə regionlardakı gənclərin də fəal iştirakının qanuni müstəvidə səsləndirilməsini labüd hesab edirəm".