Yuxarı
    Bağlamaq

    YAP əməkdaşlıq etdiyi partiyaları ermənilərin növbəti vəhşiliyini və uşaq qatillərinin əməllərini pisləməyə səsləyib

    Bu ilin birinci yarısında YAP-a 13 min üzv qəbul edilib© Report

    Bakı. 6 iyul. REPORT.AZ/ Hakim Yeni Azərbaycan Partiyası (YAP) İdarə Heyətinin növbəti iclası keçirilib.

    "Report"un xəbərinə görə, iclasda YAP-ın Sədr müavini – İcra katibi, Azərbaycan Baş nazirinin müavini Əli Əhmədov iyul ayının 4-də Füzuli rayonunun Alxanlı kəndində erməni silahlı birləşmələrinin növbəti təxribatı və insan təlafatı haqqında məlumat verib. Ə. Əhmədov qeyd edib ki, Füzuli rayonunun Alxanlı kəndində erməni silahlı birləşmələrinin növbəti təxribatı nəticəsində azyaşlı Zəhra Quliyeva və Sahibə Quliyevanın qətlə yetirilməsi qəti şəkildə pislənilməlidir.

    Bildirilib ki, insanlığa yaraşmayan bu hərəkət erməni terrorçularının uşaq qatili olduğunu bir daha sübuta yetirib. Ermənistanın işğalçı hərbi birləşmələri tərəfindən təmas xəttinə yaxın ərazilərin atəşə tutulması, dinc əhalinin qətlə yetirilməsi Ermənistanın dövlət siyasətinə çevrilib. Bu vəhşilik bir daha göstərir ki, erməni təcavüzünün qarşısının alınmaması, beynəlxalq təşkilatların, xüsusilə də ATƏT-in Minsk qrupunun həmsədrlərinin biganəliyi erməni terroristlərinin əl-qolunu açır və mahiyyət etibarı ilə dinc insanların vəhşicəsinə qətlə yetirilməsinə rəvac verir.

    İdarə Heyətinin iclasında qərara alınıb ki, Yeni Azərbaycan Partiyası əməkdaşlıq etdiyi partiyalara, parlamentarilərə müraciət edərək erməni silahlı birləşmələrinin növbəti vəhşiliyini və bu uşaq qatillərinin əməllərini pisləməyə səsləsin.

    İdarə Heyətinin iclasında, həmçinin, 2017-cı ilin birinci yarısında həyata keçirilmiş tədbirlər və İdarə Heyətinin 2017-cı ilin ikinci yarımilliyinə dair iş planı müzakirə edilib. YAP İdarə Heyətinin 2017-cı ilin birinci yarımillik fəaliyyəti haqqında hesabatı qəbul edilib. Qeyd edilib ki, 2017-cı ildə də Azərbaycanın iqtisadi və sosial həyatında inkişaf uğurla davam etdirilib.

    Vurğulanıb ki, 2017-cı ilin müvafiq dövründə Yeni Azərbaycan Partiyası müxtəlif xarakterli bir sıra mühüm tədbirlər həyata keçirməklə ölkənin ictimai-siyasi həyatında yaxından iştirakını davam etdirib.

    YAP beynəlxalq əlaqələrinin daha da genişləndirilməsi istiqamətində səylərini uğurla davam etdirib. Xüsusilə müxtəlif ölkələrin aparıcı partiyaları və demokratik təsisatları ilə Yeni Azərbaycan Partiyası arasında işgüzar və səmimi münasibətlər daha da genişləndirilmiş, bir sıra mühüm görüşlər keçirilib.

    Qeyd olunub ki, 2017-cı ilin birinci yarım ilində Yeni Azərbaycan Partiyasının sıralarına 13 min nəfərdən çox yeni üzv qəbul edilib, bununla da partiya üzvlərinin sayı 700 min nəfəri keçib. Partiyaya daxil olanların sırasında gənclər və qadınlar üstünlük təşkil edib.

    İclasda YAP İdarə Heyətinin 2017-cı ilin birinci yarım ilinə dair hesabatı, İdarə Heyətinin 2017-cı ilin ikinci yarımilliyinə dair iş planı geniş müzakirə olunduqdan sonra qəbul olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi