Bakı. 26 sentyabr. REPORT.AZ/ "Azərbaycanın müstəqilliyini elan etdiyi andan bəri Türkiyə müxtəlif sahələrdə Azərbaycanla sıx əməkdaşlıq edib. "Ceyrançöl" layihəsi həm də Türkiyə üçün əhəmiyyətli layihədir".
"Report" xəbər verir ki, bunu ANAMA-NATO/NSPA Sülh Naminə Tərəfdaşlıq Etimad Fondu çərçivəsində icra olunan “Ceyrançöl layihəsinin 3-cü mərhələsinin təqdimatı, Gələcəkdə Azərbaycanda İcra Olunacaq Etimad Fondu Layihələrinin Perspektivləri” mövzüsunda tədbirdə Türkiyənin Azərbaycandakı səfiri Erkan Özoral deyib.
Onun sözlərinə görə, bu münasibətlər sayəsində Türk səfirliyi təxminən 13 il NATO-nun Azərbaycandakı kontakt səfirliyi olub. E.Özoral bildirib ki, "Ceyrançöl" layihəsinin həyata keçirilməsi üçün Türkiyə 200 min avro ayırıb.
O qeyd edib ki, hazırda Cocuq Mərcanlı kəndində ərazinin minalardan təmizlənməsi üzrə işlər gedir və bu, əhalinin orada təhlükəsiz şəkildə yaşayışını təmin edəcək.
Öz növbəsində, tədbirdə çıxış edən ABŞ-ın Azərbaycandakı səfiri Robert Sekuta ABŞ hökumətinin Ceyrançöl layihəsini dəstəklədiyini və layihənin 3-cü mərhələsini də dəstəkləyəcəyini bildirib.
"Donor ölkələrlə birlikdə 40 kv.km. sahə sursat və partlamamış minalardan təmizlənib. Partlamamış minaların insanların həyatına necə təsir etdiyini bilirik. ABŞ 1999-cu ildən bəri Azərbaycanda minalardan təmizləmə layihələrinə 30 milyon dollar məbləğində vəsait ayırıb", - o deyib.