Yuxarı

​Tanınmış amerikalı politoloq da ATƏT-in Minsk Qrupunun formatının dəyişdirilməsi təklifini dəstəkləyib

O, Qrupa Türkiyə və Almaniyanın da həmsədr kimi daxil edilməsinin vacibliyini bildirib

Bakı. 20 aprel. REPORT.AZ/ ABŞ-dan ATƏT Parlament Assambleyasının (PA) Siyasi məsələlər və təhlükəsizlik komitəsinin sədr müavini, Büro üzvü, deputat Azay Quliyevin Ermənistan-Azərbaycan, Dağlıq Qarabağ münaqişəsinin həlli prosesində həmsədrlik institutunun formatının dəyişdirilməsi ilə bağlı təklifinə dəstək gəlib. “Report”un məlumatına görə, ABŞ-ın Los Anceles şəhərində Loyola Marymount Universitetində Ermənistan-Azərbaycan, Dağlıq Qarabağ münaqişəsinə həsr edilən elmi konfransda Çapman Universitetinin əməkdaşı Dr. Ceyms Koylun çıxışı diqqəti cəlb edib. O, ATƏT-in Minsk Qrupunun fəaliyyətini kəskin şəkildə tənqid edərək, bu qurum tərəfindən indiyə qədər görülən işlərin, irəliyə sürülən təkliflərin heç bir nəticə vermədiyini, fəaliyyətinin real sülhün təmin edilməsi baxımından yarıtmaz olduğunu qeyd edib. C.Koyl ATƏT-in Minsk qrupunun həmsədrlərindən ibarət hazırkı formatın uzun illər keçməsinə baxmayaraq özünü doğrultmadığını vurğulayaraq, bu Qrupa Türkiyə və Almaniyanın da həmsədr kimi daxil edilməsinin vacibliyini bildirib.

Qeyd edək ki, konfrans ABŞ-ın bir sıra mötəbər beyin mərkəzləri və universitetləri, o cümlədən Atlantik Şura, Los Anceles Beynəlxalq Məsələlər Şurası, Cənubi Kaliforniya Universiteti və Çapman Universiteti tərəfindən təşkil olunub. Tədbirdə beyin mərkəzlərinin tanınmış ekspertləri, Almaniya Bundestaqının üzvü və ATƏT-in Parlament Assambleyasının sədr müavini Doris Barnet, sabiq ABŞ və Avstraliya diplomatları, Cənubi Kaliforniya, Börkli, Çapman və Stanford universitetlərinin professorları və digər nüfuzlu şəxslər iştirak edib, məruzələr dinlənilib.

Xatırladaq ki, Azay Quliyev Ermənistan-Azərbaycan, Dağlıq Qarabağ münaqişəsinin həll prosesinə Almaniya və Türkiyənin yaxından cəlb edilməsi və hazırda 3 ölkədən ibarət həmsədrlik institutunun dəyişdirilərək “5-lik Sədrlər Şurası” ilə əvəz olunması təklifi ilə çıxış edib. Bu təklif bir çox Avropa ölkələrinin, beynəlxalq təşkilatların, beyin mərkəzlərinin təmsilçiləri, o cümlədən Almaniya və Türkiyənin tanınmış siyasi xadimləri, parlamentariləri, ekspertlər, politoloqlar tərəfindən dəstəklənib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi